কবিতা
দুগর সবন আর কদক?
রনজিত চাঙমা (০২/০১/২০২১ইং)
মোন মুরোর ছেরে ছেরে কদ' সবন আঙি যার
নেই মেইয়েই,নেই কোচপানায় গারেগায়,
চিদর ঘরত তেপ তেপ গোরি ঘাম ঝরের বেসদরে,
পরানানি গরের চিগুত চাগাত ধরপরার এগজায়।
পিত্থিমিয়ান মনে অয় গিরগিরে উধের,বহ বাজের
গরম,তার লাম্বা দিগুলি বহ নিজেস,
বোয়েরান এইনেই কানে কানে কি কোই যার তারে
ন' পাত্তন কনজনে এক্কায়ো গোরি হিয়েজ।
কুল নেইয়্যে মনর গভীনত সাগরত ডুবি ডুবি বেগে
কি ওইয়্যে কিজেনি সংসারান?
উলোমস্ত বেসুনজুক কিরব্যেনি যিয়োত সিয়োত বানা
লুগেই দি যার কোচপানার সুগর মাজারান।
বুঝিবার নেই,কবার নেই অজক কলক মনানিলোই
টেলাটেলি মেজামেজি যাদন গোরি,
কজরা বোয়েরান দুমুলুক খেলার মোনমুরোত সমানে
এলোনি কেলোনি সদর ভদর বেক,আদাঙা যাদন উরি।
এগদিন সুগ পেবং আমি,দেগির কদক বুবর সবন
পেক্কুনে গেবাক গীদ,ফুলুন ফুদিবাক তুম্বাজ ছিদিবাক,
নাজিবাক পত্তাপত্তি ভঙরা,নাদেংপত্তিউন তিনাঙে
আগ' সান গোরি,বেগে সুগর সবন দেগিবাক।
&&&&&&&
