কবিতা
চেঙে
কবি- নীল চন্দ্র চাকমা
কদক জাগা ঘুরিলুং
কদক জিনিস দেঘিলুং
কদক কধা শুনিলুং
কনকিত্যা ন’ পেলুং, ত সান
ও মর সমারর চেঙেয়ান।
আঙুরি বিঙুরি দাগে
কেঙরি মা-ভাচ লেঘে
শিঘিনে ত বুগত বেগে
চোখ মু ফুদেই আন্দারত্তুন পহরান
দেঘেয়োচ ও মর শিঘেয়ে চেঙেয়ান।
নুনজ পানজা ন’ চিনি
ধাঙর দীঘোল উয়ং জানি
খেইনে তর পহন-মিদে পানি
তুই জুরেইয়োচ তদা তিরোচ্চান
ও মর আওজর চেঙেয়ান।
ত বুগর খেত-খেত্তিয়ে
বাজে রাঘেয়োচ অতালেয়ে
জনমভরা সুগে শান্তিয়ে
পেবার আঝা ন’ গরি সদর মা-বো সান
ও মর পরানর চেঙেয়ান।
ত বুগত জনম লোগাং পুজগাং
দুধুকছড়া খেদারছড়া পানছুরি লুদিবান
ভেই-বোনছড়া পেরাছড়া গাছবান
কুগিছড়া তারাবন্যা খাগারাছুরিয়ান
ও মর স্বর্গপুরি চেঙেয়ান।
মালছুরি কুদুকছুরি কাদাছুরি
চঙরাছুরি মৌবাছুরি করল্যাছুরি
কমলছুরি, বেতছুরি শুগুনোছুরি
সাজেই তুয়োচ দোলগরি, সপ্পান
ও মর কাবিল চেঙেয়ান।
কন উনো ন’ পিদুং
কন তোচ্চ্যে ন’ খিদুং
ত বরে নিত্য জিনিদুং
জেরেদি ত বুগত সুগে মরিদুং চাঙ
ও মর স্ববনর চেঙেয়ান।
###
কোন মন্তব্য নেই:
একটি মন্তব্য পোস্ট করুন