কবিতা
মা গোমেত
কবি- নীল চন্দ্র চাক্মা
তেইশ বঝর পরে, মা গোমেত তরে
চেবার এলুঙ কেঞ্জান আগচ? সমারে
কদক দেঘা অদ জেবত ণাদেং এক্ক লোইনে
রিং হাদেই লুমিদুংগি ত পারত এইনে ।
কদক খেলেয়ং ত বুগত চিগোনকালে
কদক কিয়ে কাজেই দিদে, জার গরিলে
কুলোত উধি রোদ পুয়েদুং উমুচ্ছে গরিলে
পেনদলং খুলি ঝাম মারিদং ত বুগত ভিলে ।
হাধ গাবিলই সিগোন পুজি বাজিলে চাম্ভাত
ত পানিলোই হাজেদুং ধুলি ধুলি খবরপাত।
কদক বেরেয়ং ত বুগত সাজুরি সাজুরি
এ কুলত্তুন ও কুলত জিতবাদ গরি
সমাজ্জে লগর লগে ফিরিদুং শিবিরত
গদা দিনর ছাবা দেঘিদুং তরে স্ববনত।
ফিরিদুং অক্তে অক্তে চেইনে এক টেঙাদি
সিনেমা কভুর ভিডিও হলত মিঠুন-শ্রীদেবী।
চিগোনকাল্ল্যে পজানি থোগেই চেলুং নেই
এক টেঙার কুড়িবো অরেঞ্জ চগলেচ কদক খিয়েই
বাতাশা মুলি পিদে খই চনা বোত্তোই
টেঙাত চেরান চরগাকাদা পিদে কুদু গেলাক্কই?
বকখারা খেলেয়ে চারমিনার সিগিরেত্তুন কুদু?
কদক আওজ গরি চেবার এলুং ত সিদু।
তর মনত থেলেও কোই ন জানচ, মর মনত আগে
তল্লোই আমি ফারক উয়েই তেইশ বঝর আগে।
কোন মন্তব্য নেই:
একটি মন্তব্য পোস্ট করুন