কবিতা
চেঙেবি
নূতন ধন চাকমা
চেঙে পাড়ত জনম মর
নাঙয়ানও মর চেঙেবি।
চেঙে হুলে থাঙ হেনেই মুই,
সিত্ত্যেয় ডাগন চেঙেবি।
ও--- রে---
চেঙে পাড়ত জনম মর
নাঙয়ানও মর চেঙেবি।
চেঙে ছড়ান বেঙা-হুঙয়া,
পাড়ানিত আগে চেঙে তারা।
চেঙে তারা সেরে বেড়াদে মত্তুন
গম লাগেদে বেজ গুরি।
চেঙে পাড় জনম মর
নাঙয়ানও মর চেঙেবি(২)
চেঙে পাড় হ্'রলিয়ানি,
তায়দে নিত্ত্যো জুলি জুলি।
হ'রলি ছেড়ে বেড়াদে মত্তুন
গম লাগে দে বেজ গুরি।
চেঙে পাড়ত জনম মর
নাঙয়ানও মর চেঙেবি।
বারজ্যে কাল্যে চেঙে গাঙান
থায়দে নিত্তো গাবুর মনে।
তরে দেলে চিত জুরায় মর,
বেড়াঙ নিত্তো ত পাড়ে।
আদু সঙ, রান সঙ যক্ক্যে অভে
হুজিয়ে মর, মনান নাজে।
চুল ঈরি দ্বি বেড়াঙে মুইও
বেড়াঙ নিত্তো ত পাড়ে।
চেঙে পাড়ত জনম মর
নাঙয়ানও মর চেঙেবি।
চেঙে হুলে থাঙ হেনেই মুই,
সিত্ত্যেয় ডাগন চেঙেবি।
ও--- রে---
চেঙে পাড়ত জনম মর
নাঙয়ানও মর চেঙেবি।
পুর-১৫.০১.২০২১ইং।
কোন মন্তব্য নেই:
একটি মন্তব্য পোস্ট করুন